“黄金周”

MSN上面朋友嘅space，我一直都有睇，但係已经好耐未留言过，至于自己嘅space就直程好耐冇打开过了，今日打开睇下，发现原来上一篇文章已经係上个月嘅事了，难得有个黄金周可以休息，写翻几只字。或者用翻咗工，太忙而唔写space哩个借口有啲‘行’，大家都做咗嘢啫，但係我宜家先明，当时入kp面试，识咗个人，加佢msn从来唔见踪影，亦都甚少写space，自己开始翻工先发现，自己翻到屋企，连电脑都唔想开。讽刺嘅係，我其实一直都只係training紧，仲未正式做自己嘅份内事……放假翻去之后，manager已经帮我分好咗group，意味着我真正有事做了。

 

KPMG嘅生活都算几多姿多彩，有波踢，都有波打，放假前，marketing嘅秘书仲打电话俾我，叫我参加注协嘅羽毛球赛，呵呵，我读书嘅时候都冇咁sporty啊。不过，仲係应该谨记，要行事低调。

 

虽然今晚有心写啲嘢，但係最近真係冇咩谂头，亦都冇咩灵感，任由佢流水帐咯，反正会计平时都係记流水帐噶啦，^_^

 

“黄金周”果然处处係黄金，无论你去边度，做咩事，都要洗钱。或者每日留喺屋企咩都唔做，先係“黄金周”可以带俾大家嘅最大财富。未做嘢嘅时候，就当自己有收入，花钱唔节制，后果就係，有咗收入之后要节制，为嘅係尽快还清债务，然后再过安安稳稳嘅日子，快快乐乐。

 

今日同一班初中同学踢波，好开心，记得以前都係咁踢，但係我哋会係二中附近嘅空地寻找快乐，例如附近嘅一个大院，市府门前嘅空地，甚至二中对出嗰条马路（係咪好狼死呢？），宜家大家似乎有要求了，于是租咗个室内场，仲要係草地；以前我哋个个着三球，今日失翀着nike嘅boot；以前大家自己个水壶里面装咗水，宜家一去到未踢就买咗箱水。但係大家个样都係一样噶，踢波嘅样都一样，李生维维嘅速度仍然唔可以高估（我今日改咗个讲法，叫唔好低估佢…嘅体重），李鸣锋仍然好好波，胡嘉仍然好好演技，李少杰仍然係一嚟到就开始撩是斗非，杜莹莹仍然会落场同我哋一齐踢，失翀见到佢之后仍然会劲好多……我同佢哋一齐踢波嘅时候，仍然可以入到好多波，^_^（可惜喺KPMG，我要做龙门-_-!!）

 

踢完波佢哋一齐食饭，刚刚见到李生上msn，翻到屋企了。我为咗悭啲钱，所以翻咗屋企食（汗…）。翻屋企嘅时候，喺地铁见到三个中学生，两个男仔，一个女仔，可能係参加完合唱队之类嘅培训，坐车翻屋企咯。地铁里面人好多，佢哋本来并冇引起我嘅注意，我亦都唔会知道佢哋係学唱歌嘅，但係或者因为意犹未尽，后来佢哋係地铁里面仍然继续练习，好得，好紧。因为一开始，我并唔知道係佢哋练歌，我以为有人係地铁里面用psp睇电影《放牛班的春天》（The Chorus），大家应该可以想象到佢哋有几劲。望住佢哋，好羡慕…

 

好攰啊今日，听日就中秋了，大家中秋快乐吖！